.
ఉద్యోగుల భద్రత ప్రభుత్వ బాధ్యత అని ప్రభుత్వ పధకాలను ప్రజలకు చేరవేసే ఉద్యోగులకు ప్రభుత్వం అధికారంలోకి రాకముందు ఇచ్చిన హామీలను, అధికారంలోకి వచ్చిన తర్వాత వాటిని అమలు చేయడంలో జాప్యం చేయడం తగదని శ్రీకాళహస్తి జె ఏ సి తాలూకా చైర్మన్ సి . చెంచురత్నం యాదవ్ అన్నారు .
రాష్ట్ర జె ఏ సి నాయకుల పిలుపు మేరకు శ్రీకాళహస్తి పట్టణంలోని ఏపీ ఎన్ జి ఓ కార్యాలయం నుండి ఉద్యోగ , ఉపాధ్యాయ , కార్మిక , పెన్షనర్లు ఐక్య వేదిక ఆధ్వర్యంలో స్థానిక ఆర్టీసీ బస్టాండ్ కూడలి వద్ద ఉన్న అంబేద్కర్ విగ్రహం వరకు ర్యాలీ నిర్వహించారు.
ఈ సందర్భంగా శ్రీకాళహస్తి జె ఏ సి తాలూకా చైర్మన్ సి . చెంచురత్నం యాదవ్ మాట్లాడుతూ ప్రభుత్వం అధికారంలోకి రాక ముందు ఉద్యోగులకు పలు హామీలు ఇచ్చిందని అయితే కాలయాపనతో ఉద్యోగుల్లో అభద్రతా భావం ఏర్పడుతోందన్నారు .
పలుమార్లు రాష్ట్ర నాయకులు ప్రభుత్వ పెద్దలతో చర్చలు జరిపినా స్పందన లేకపోవడం శోచనీయం అన్నారు . అందుకే ఉద్యమాల బాట ఎంచుకున్నామని అప్పుడైనా ప్రభుత్వంలో కదలిక వస్తుందని ఆశిస్తున్నామన్నారు.
ఇందులో భాగంగానే ఈ నెల 7 నుండి 10వ తేదీ వరకు డిమాండ్ల సాధన కోసం నల్ల బ్యాడ్జీలతో నిరసన తెపిపామన్నారు .
తమ న్యాయమైన డిమాండ్ల సాధన కోసం ఈ నెల 16న మండల కేంద్రాల్లో , 21వ తేదీన జిల్లా కలెక్టరేట్ వద్ద ధర్నాలు నిర్వహించనున్నామన్నారు . 26వ తేదీన రాష్ట్ర స్థాయిలో భారీ స్థాయి బహిరంగ సభ నిర్వహిస్తున్నామన్నారు . ప్రభుత్వ పధకాలను ప్రజలకు చేరవేసే ఉద్యోగుల న్యాయమైన డిమాండ్లను పరిష్కరించాలన్నారు .
తాము ప్రభుత్వానికి వ్యతిరేకం కాదని ప్రభుత్వ పధకాలను ప్రజల్లోకి తీసుకెళ్లే తమ సమస్యలను వెంటనే పరిష్కరించాలన్నారు . ఇప్పటి వరకు ఏడు డి ఏ లు పెండింగ్ లో ఉన్నాయని , వచ్చే జనవరి కి మరొక డి ఏ ఇవ్వాల్సి వస్తుందన్నారు .
ఇచ్చిన హామీలను ప్రభుత్వం వెంటనే నిలబెట్టుకోవాలని కోరారు. పెన్షనర్లు సంఘం నాయకులు వెంకయ్య మాట్లాడుతూ పీఆర్సీ నివేదికను బహిర్గతం చేసి సంఘ నాయకులకు తెలియజేయాలన్నారు .
నిరసన కార్యక్రమంలో శ్రీకాళహస్తి జె ఏ సి తాలూకా చైర్మన్ సి . చెంచురత్నం యాదవ్ , ఉద్యోగ , ఉపాధ్యాయ , కార్మిక , పెన్షనర్లు ఐక్య వేదిక భాస్కర్ , సుబ్బారెడ్డి , శ్రీనివాసులు , విజయకుమార్ , రవీంద్ర , హేమ , సురేష్ , నాగరాజు , ఈశ్వరబాబు , మునికుమార్ , సుబ్బరామయ్య , ప్రసాద్ , మధుసూదన్ , జయానందంలతో పాటు శ్రీకాళహస్తి , తొట్టంబేడు, ఏర్పేడు , బుచ్చినాయుడుకండ్రిగ , కెవిబి పురం మండలాల ఎన్జీవో నాయకులు పాల్గొన్నారు.
