.
*నూతన ఆశల ప్రభాతం ‘2026’!
*ముగిసిన మరో ఏడాది ప్రయాణం
*ముంగిట నిలిచిన నూతన వసంతం
కాలం ఎవరి కోసమూ ఆగని ప్రవాహం. నిన్నటి కష్ట సుఖాల తీరాలను దాటుకుంటూ… రేపటి విజయాల సాగరం వైపు కాలచక్రం మరో మలుపు తిరుగుతోంది. ముగిసిపోతున్న 2025వ సంవత్సరం తనతో పాటు అసంఖ్యాక జ్ఞాపకాలను, కొన్ని కన్నీళ్లను, మరెన్నో తీపి గుర్తులను మూటగట్టుకుని చరిత్ర గర్భంలోకి ఒరిగిపోతుంటే… అప్పుడే పుట్టిన పసిపాప నవ్వులా, స్వచ్ఛమైన మంచు బిందువులా 2026 నూతన సంవత్సరం మన ముంగిట కమనీయంగా ఆవిష్కృతమవుతోంది.
అనుభవాల దొంతర – 2025
గడచిన ఏడాది కేవలం క్యాలెండరులో మారిన పేజీ మాత్రమే కాదు… అది మన జీవితాల పుస్తకంలో లిఖించబడిన ఒక సుదీర్ఘ అధ్యాయం. సవాళ్లు ఎదురైనప్పుడు ధైర్యంగా నిలబడటాన్ని, వైఫల్యాలు పలకరించినప్పుడు కొత్తగా ఉద్భవించడాన్ని ఈ ఏడాది మనకు నేర్పింది. రాజకీయ యవనికపై కొత్త వెలుగులు… అభివృద్ధి బాటలో సాగిన పరుగు… శాంతిభద్రతల పరిరక్షణలో సాధించిన విజయాలు 2025కు ఒక విశిష్టతను చేకూర్చాయి. ముఖ్యంగా చిత్తూరు జిల్లా నేరరహిత సమాజం దిశగా వేసిన అడుగులు ప్రజల గుండెల్లో భరోసా దీపాలను వెలిగించాయి.
ఆశల కిరణం – 2026
ఏడాది మారుతోంది.. మరి మనసు మారాలి. మనిషి మారాలి. పాతాళానికి పడిపోయినా మళ్ళీ ఆకాశమంత ఎత్తుకు ఎదగాలనే తపనే నూతన సంవత్సర సందేశం.
• నిన్నటి పాఠం: గతం ఒక అనుభవం. భవిష్యత్తు ఒక ఆశయం. నిన్నటి తప్పులను సరిదిద్దుకుంటూ నేటిని అద్భుతంగా మలచుకోవడమే అసలైన జీవన వేదం.
• నేటి సంకల్పం: “అలసట లేదు.. ఆగిపోవడం అంతకంటే లేదు” అనే దృఢ సంకల్పంతో 2026కు స్వాగతం పలుకుదాం.
• ప్రేరణ: ఓటమిని చూసి కుంగిపోవద్దు, గెలుపును చూసి పొంగిపోవద్దు. నిరంతర సాధనే లక్ష్యంగా, విజ్ఞానమే ఆయుధంగా కొత్త ఏడాదిలో అడుగు పెడదాం.
నవ ఉషస్సు వైపు…
ముదురుతున్న చీకట్లు కరిగిపోతూ… తూర్పున రేపు ఉదయించబోయే సూర్యుడు సరికొత్త ఆశల కిరణాలను మోసుకొస్తున్నాడు. పాత చేదు జ్ఞాపకాలను గాలికి వదిలేసి, రేపటి బంగారు భవిష్యత్తుకు బాటలు వేసుకుందాం. సమాజం పట్ల బాధ్యతను… తోటి మనిషి పట్ల ప్రేమని పంచుతూ నవ సమాజ నిర్మాణంలో భాగస్వాములవుదాం. ప్రతి హృదయం ఆనందంతో నిండాలని, ప్రతి ఇల్లు సుఖశాంతులతో విరాజిల్లాలని ఆకాంక్షిస్తూ…అందరికీ నూతన సంవత్సర (2026) శుభాకాంక్షలు!
Discussion about this post